Today’s Health News 31-12-2024

2025 ജനുവരി ഒന്ന് മുതൽ ജനറേഷൻ ബീറ്റ അഥവാ ‘ജെന്‍ ബീറ്റ’ എന്ന പുതിയ ജനസംഖ്യാ ഗ്രൂപ്പ് ആരംഭിക്കുമെന്നു റിപോർട്ടുകൾ. 2025-നും 2039-നും ഇടയിൽ ജനിക്കുന്ന കുട്ടികളെയാണ് ഈ ഗ്രൂപ്പില്‍ ഉൾപ്പെടുത്തുന്നത്. 2010 നും 2024 നും ഇടയിൽ ജനിച്ചവരാണ് ജനറേഷന്‍ ആല്‍ഫ. ആൽഫ ജനറേഷന് മുമ്പ് ജനറേഷൻ ഇസഡ് (1995-2009), അതിന് മുമ്പ് ജനറേഷൻ Y (1980-1994) എന്നിവ വന്നിരുന്നു. ഡിജിറ്റൽ ലോകത്തിൽ ജനിച്ചു വളരുന്ന ജെന്‍ ബീറ്റ കുട്ടികള്‍ ആർട്ടിഫിഷ്യൽ ഇന്റലിജൻസ്, വെർച്വൽ റിയാലിറ്റി തുടങ്ങിയ സങ്കേതവിദ്യകളുമായി അടുത്ത ബന്ധം പുലർത്തുമെന്നാണ് ജനറേഷൻ ലേബലുകൾ നിർവചിക്കുന്നതിൽ പ്രശസ്തനായ ഗവേഷൻ മാർക്ക് മക്രിൻഡിൽ പറയുന്നത്. എഐ, വെർച്വൽ റിയാലിറ്റി, ഇന്‍റർനെറ്റ് ഓഫ് തിംഗ്‌സ് (ഐഒടി) തുടങ്ങിയ നൂതന സാങ്കേതികവിദ്യകൾ ആക്‌സസ് ചെയ്യാനും അവയിൽ പ്രാവീണ്യം നേടാനും ജനറേഷൻ ബീറ്റയ്ക്ക് കൂടുതൽ അവസരങ്ങളുണ്ട്. ജനറേഷൻ ബീറ്റ ആരോഗ്യ സംരക്ഷണത്തിലും സാങ്കേതിക വിദ്യയിലും പുരോഗതി കൈവരിക്കുന്നതോടെ ഈ കാലയളവിൽ ജനിക്കുന്ന പല കുട്ടികൾക്കും കൂടുതൽ ആയുസ്സ് ഉണ്ടാകും. സാമൂഹിക നീതി, പരിസ്ഥിതി സംരക്ഷണം തുടങ്ങിയ മേഖലകളിൽ വലിയ മാറ്റങ്ങൾക്ക് ഇവർ നേതൃത്വം നൽകുമെന്നാണ് പഠനങ്ങൾ പറയുന്നത്. ‘ജനറേഷൻ ആൽഫ’ എന്ന പദം ഉപയോഗിച്ച സാമൂഹിക ഗവേഷകനും ഫ്യൂച്ചറിസ്റ്റുമാണ് മാർക്ക് മക്രിൻഡിൽ.