Today’s Health News 02-12-2023

പിതാവിന്റെ അപേക്ഷയില്‍ ടൈപ് വണ്‍ ഡയബറ്റിസ് രോഗത്തെക്കുറിച്ച് ഇനി പത്താം ക്ലാസ് പാഠപുസ്തക സിലബസ്സില്‍ പഠിപ്പിക്കും. പത്താം ക്ലാസ് ബയോളജി പാഠപുസ്തകത്തിലാണ് കുട്ടികളിലെ പ്രമേഹത്തെക്കുറിച്ചുള്ള ഭാഗങ്ങള്‍ ഉള്‍പ്പെടുത്താന്‍ എസ്.സി.ഇ.ആര്‍.ടി തീരുമാനം. സംസ്ഥാനത്ത് പ്രമേഹം ബാധിച്ച കുട്ടികളുടെ എണ്ണം നിരന്തരം കൂടി വരുന്ന സാഹചര്യത്തില്‍ കാര്യവട്ടം എല്‍.എന്‍.സി.പി.ഇക്ക് സമീപം പുതുവല്‍ പുത്തന്‍ വീട്ടില്‍ ബുഷ്‌റ ഷിഹാബിന്റെ നിവേദനമാണ് ടൈപ്പ് 1 ഡയബറ്റിസ് സിലബസ്സില്‍ ഉള്‍പെടുത്താന്‍ വഴിതുറന്നത്. ടൈപ്പ് വണ്‍ ഡയബറ്റിസ് ബാധിച്ച മകന്റെ അനുഭവങ്ങളാണ് നിവേദനത്തിന് കാരണമായത്. രോഗാവസ്ഥയെക്കുറിച്ച് മറ്റ് കുട്ടികളില്‍ പാഠപുസ്തകത്തിലൂടെ അവബോധമുണ്ടായാല്‍ കളിയാക്കുകയോ ഒറ്റപ്പെടുത്തുകയോ ചെയ്യുന്ന പ്രവണതയില്‍ മാറ്റമുണ്ടാക്കാനാകുമെന്ന് നിവേദനത്തില്‍ അദ്ദേഹം ചൂണ്ടിക്കാണിച്ചിരുന്നു. ഇത് പരിഹഗണിച്ചാണ് SCERT തീരുമാനം.

വൈറ്റ് ലങ് സിന്‍ഡ്രോം സ്ഥിരീകരിച്ച് രാജ്യങ്ങള്‍. അമേരിക്ക, ഡെന്‍മാര്‍ക്ക്, നെതര്‍ലാന്‍ഡ്‌സ് എന്നീ രാജ്യങ്ങളില്‍ ഗുരുതര ശ്വാസകോശ രോഗമായ വൈറ്റ് ലങ് സിന്‍ഡ്രോം സ്ഥിരീകരിച്ചുവെന്ന് ദി മിറര്‍ റിപ്പോര്‍ട്ട് ചെയ്തു. ഡെന്‍മാര്‍ക്കില്‍ മഹാമാരിക്ക് സമാനമായ അവസ്ഥയിലാണ് ഈ രോഗമെന്നും നെതര്‍ലാന്‍ഡ്‌സിലും നിരക്കുകള്‍ ഉയര്‍ന്നുകൊണ്ടിരിക്കുകയാണെന്നും റിപോര്‍ട്ടുകള്‍ പറയുന്നു. മൈകോപ്ലാസ്മ ന്യുമോണിയ എന്ന, ശ്വാസകോശരോഗങ്ങള്‍ക്കിടയാക്കുന്ന ബാക്ടീരിയല്‍ അണുബാധ കാരണം ബാധിക്കുന്ന രോഗമാണിതെന്നാണ് വിദഗ്ധര്‍ പറയുന്നത്. അമേരിക്കയിലെ ഒഹിയോയില്‍ മാത്രം 150 കേസുകളാണ് കഴിഞ്ഞ ഒരുമാസത്തിനിടെ റിപ്പോര്‍ട്ട് ചെയ്തിരിക്കുന്നത്. എന്നാല്‍ നിലവിലുള്ളത് സീസണലായി കാണപ്പെടുന്ന രോഗവ്യാപനമാകാമെന്നും, നിരീക്ഷിച്ചു വരികയാണെന്നുമാണ് Centers for Disease Control and Prevention വ്യക്തമാക്കുന്നു.

കേരളത്തില്‍ 5 വര്‍ഷത്തിനിടെ 69 പോലീസുകാര്‍ ആത്മഹത്യ ചെയ്തതായി പഠന റിപോര്‍ട്ടുകള്‍. ജോലി ഭാരവും, കുടുംബ പ്രശ്നങ്ങളാണ് പ്രധാന കാരണങ്ങളായി റിപ്പോര്‍ട്ടില്‍ പറയുന്നത്. പോലീസ് സേനയിലെ ആത്മഹത്യാനിരക്ക് വര്‍ധിച്ചുവരുന്നതായുള്ള റിപ്പോര്‍ട്ടുകളുടെ അടിസ്ഥാനത്തില്‍ കേരള പോലീസ് നടത്തിയ പഠനത്തിലാണ് ഭയാനകമായ വെളിപ്പെടുത്തലുകള്‍ കണ്ടെത്തിയത്. പഠനത്തിന്റെ അടിസ്ഥാനത്തില്‍, പോലീസുകാര്‍ക്കിടയിലെ ആത്മഹത്യകള്‍ പരിഹരിക്കാന്‍ നടപടിയെടുക്കണമെന്ന് ആവശ്യപ്പെട്ട് സര്‍ക്കാര്‍ സംസ്ഥാന പോലീസ് മേധാവിക്ക് കത്തയച്ചു. മാനസിക പിരിമുറുക്കമുള്ളവരും ആത്മഹത്യാ പ്രവണത കാണിക്കുന്നവരുമായ ആളുകളെ കണ്ടെത്തി അവര്‍ക്ക് കൗണ്‍സിലിംഗ് നല്‍കണമെന്ന് ആഭ്യന്തര വകുപ്പ് നിര്‍ദ്ദേശിച്ചിട്ടുണ്ട്. പോലീസുകാര്‍ക്ക് ആഴ്ചതോറുമുള്ള അവധികളും മറ്റു യോഗ്യതയുള്ള അവധികളും നല്‍കാനും എല്ലാ ജില്ലയിലും ആന്റി സ്‌ട്രെസ് ക്ലിനിക്കുകള്‍ ആരംഭിക്കാനും നിര്‍ദ്ദേശത്തിലുണ്ട്.

ആയുര്‍വേദ മികവിന്റെ കളിത്തൊട്ടിലായാണ് കേരളം അറിയപ്പെടുന്നതെന്ന് ഉപരാഷ്ട്രപതി ജഗ്ദീപ് ധന്‍കര്‍. കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ അഞ്ചാമത് ഗ്‌ളോബല്‍ ആയുര്‍വേദ ഫെസ്റ്റിവല്‍ ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിന്റെ ആയുര്‍വേദ ടൂറിസം ക്ഷേമത്തെ പ്രോത്സാഹിപ്പിക്കുക മാത്രമല്ല സംസ്ഥാനത്തിന്റെ സാമ്പത്തികവളര്‍ച്ചയ്ക്ക് ഗണ്യമായ സംഭാവന നല്‍കുകയും ചെയ്യുന്നതായും അദ്ദേഹം അഭിപ്രായപ്പെട്ടു. ആയുഷ്മാന്‍ ഭാരത് പദ്ധതിക്ക് കീഴില്‍ ആയുഷ് മന്ത്രാലയം രാജ്യത്തുടനീളം ആയുഷ് ആരോഗ്യ സ്വാസ്ഥ്യ കേന്ദ്രങ്ങള്‍ സ്ഥാപിക്കുകയാണ്. ഈ ചുവടുവയ്പ് ഒരു നാഴികക്കല്ലാണ്. പരമ്പരാഗത വൈദ്യശാസ്ത്ര സമ്പ്രദായങ്ങളുടെ വ്യാപകമായ ഉപയോഗം പ്രോത്സാഹിപ്പിക്കുന്നതിനും സാര്‍വത്രിക ആരോഗ്യ സംരക്ഷണം എന്ന ലക്ഷ്യത്തിലേക്ക് നീങ്ങാനും ഇത് ഇന്ത്യയെ സഹായിക്കുമെന്നും അദ്ദേഹം കൂട്ടിച്ചേര്‍ത്തു.

ഉദാസീനമായ ജീവിതശൈലി പിന്തുടരുന്ന സ്ത്രീകളില്‍ ഗര്‍ഭാശയത്തിലെ മുഴകള്‍ക്കുള്ള സാധ്യത ഇരട്ടിയെന്ന് പഠനം. ചൈനയിലെ കുന്‍മിങ് മെഡിക്കല്‍ സര്‍വകലാശാലയിലെ ഗവേഷകരാണ് പഠനത്തിനു പിന്നില്‍. ബി.എം.ജെ. ഓപ്പണ്‍ മാഗസിനിലാണ് പഠനം പ്രസിദ്ധീകരിച്ചിരിക്കുന്നത്. ആറോ അതിലധികമോ മണിക്കൂറുകള്‍ ഉദാസീനരായി സമയം ചെലവഴിക്കുന്ന,ആര്‍ത്തവവിരാമം അടുത്തിരിക്കുന്ന സ്ത്രീകളിലാണ് ഈ സാധ്യത കൂടുതലെന്ന് പഠനം പറയുന്നു. പകല്‍സമയത്ത് കൂടുതല്‍ ഇരുന്നും കിടന്നും സമയം ചെലവഴിക്കുന്ന സ്ത്രീകളില്‍ ഗര്‍ഭാശയത്തിലെ ഫൈബ്രോയ്ഡിനുള്ള സാധ്യത കൂടും. മുപ്പതിനും അമ്പത്തിയഞ്ചിനും ഇടയില്‍ പ്രായമുള്ള 6,623 പേരെ ആസ്പദമാക്കിയാണ് പഠനം സംഘടിപ്പിച്ചത്. ഫൈബ്രോയ്ഡ് വളര്‍ച്ച ഉണ്ടാകുന്നതിനു അമിതവണ്ണത്തിനൊപ്പം ശരീരത്തിലെ ഈസ്ട്രജന്‍ നിലയിലെ ഏറ്റക്കുറച്ചിലും വിറ്റാമിന്‍ ഡി കുറയുന്നതുമൊക്കെ ബന്ധമുണ്ടെന്ന് ഗവേഷകര്‍ വ്യക്തമാക്കുന്നു.

കൂടുതല്‍ ആരോഗ്യ വാര്‍ത്തകള്‍ക്കായി ഡോക്ടര്‍ ലൈവ് ടി വി സബ്‌സ്‌ക്രൈബ് ചെയ്യുക.