മത്സ്യബന്ധനത്തിനിടെ അപകടകാരിയായ ബറക്കുഡ മത്സ്യത്തിന്റെ കുത്തേറ്റ് ഗുരുതര പരിക്കേറ്റ മാലദ്വീപ് സ്വദേശിക്ക് കൊച്ചി അമൃത ആശുപത്രിയിലെ വിദഗ്ധ ചികിത്സയിലൂടെ പുതുജീവന്‍. കടലിനടിയിലെ രാത്രി മത്സ്യബന്ധനത്തിനിടെയാണ് ടൈഗര്‍ ഫിഷ് ഗണത്തില്‍പെടുന്ന ബറക്കുഡ മത്സ്യം യുവാവിനെ ആക്രമിച്ചത്. മത്സ്യത്തിന്റെ കുത്തേറ്റ് കഴുത്തിന് പിറകിലുള്ള നട്ടെല്ല് തകരുകയും സുഷുമ്‌ന നാഡിക്ക്? ഗുരുതര പരിക്കേല്‍ക്കുകയും ചെയ്തു. യുവാവിനെ ആദ്യം സ്വദേശത്തെ ആശുപത്രിയിലാണ് പ്രവേശിപ്പിച്ചത്. എന്നാല്‍ പരിക്ക് ഗുരുതരമായതിനാല്‍ എയര്‍ ലിഫ്റ്റ് ചെയ്ത് അമൃതയില്‍ എത്തിക്കുകയായിരുന്നു. മത്സ്യത്തിന്റെ പല്ല് സുഷുമ്‌ന നാഡിയില്‍ തറച്ചതിനാല്‍ യുവാവിന്റെ ഇടതുകൈയും കാലും തളര്‍ന്ന അവസ്ഥയിലായിരുന്നു. വിദഗ്ധപരിശോധനയില്‍ കഴുത്തിലെ സുഷുമ്‌ന നാഡിയില്‍ മത്സ്യത്തിന്റെ പല്ലിന്റെ പത്തിലധികം ഭാഗങ്ങള്‍ തറച്ചതായും ഡോക്ടര്‍മാര്‍ കണ്ടെത്തി. ന്യൂറോ സര്‍ജറി വിഭാഗം മേധാവി ഡോ. സജേഷ് മേനോന്റെയും ഡോ. ഡാല്‍വിന്‍ തോമസിന്റെയും നേതൃത്വത്തിലുള്ള വിദഗ്ധസംഘം യുവാവിനെ ശസ്ത്രക്രിയക്ക് വിധേയമാക്കി. ഗുരുതരാവസ്ഥ തരണംചെയ്ത യുവാവിനെ വാര്‍ഡിലേക്ക് മാറ്റിയിട്ടുണ്ട്.
Discussion about this post